Solsticiu de Branu

Travesía Lloviu - Nueva (Cordal de Cueva Negra)

2010-01-14T23:09:00.002+01:00

Archivos GPS:

Track: descargar (gpx)

Llugar: Ribesella / LLanes
Duración: 7 hores
Puntu de salida: Lloviu
Desnivel: 700m (pero el acumuláu ye abondo mayor)
Dificultá: Media

   Ruta afayadiza pa facela pel iviernu cuando hai ñeve nos cordales del interior d'Asturies. Pa averase a Lloviu gárrase'l desvíu de la A-8 de Lloviu, y xustu na retonda hai una salida que mos lleva a una zona paralela a la carretera. Ehí dexamos el coche. La travesía va en tou momentu paralela a la autopista A-8 pel cordal que hai de llau: El cordal de Cueva Negra.

   La primera parte del percorríu ye una subida un poquiñín agresiva y salvando les molestes cotolles hasta algamar el primer oxetivu: El Cabezu(366m), que ye la peñona que ves de frente cuando vas pela autopista en sentíu Santander.
   A partir d'equí trátase de dir crestiando y faciendo tolos altos que vamos alcontrando hasta llegar al Picu Maor que tá xustu enriba de Nueva. Más concretu vamos facer cume nos siguientes altos: Picu Cueri (580m), Picu H.orovitaya (719m), Altu Teyadera (743m), Los Cuetos Medios, Picu Bacia (565m), Tejucas (555m), Picu Sorrolles (555m), Picu Gurugú (517m) y Picu Maor (376m).

   Hai que sorrayar qu'una bona parte del percorríu vas pinchándote por mor de les cotolles y los escayos que tán espardíos per tol cordal. Amás, hai una parte bien mala de caminar poles piedres afilaes q tien y les cotolles, que ye la baxada xusto depués de facer cume nel Picu Bacia. Alcontramos un pastor llaniscu que mos lo alvirtió, y de fechu les nuestres piernes pudieron comprobalo.

El Cabezu al fondo

Vamos dexando la autopista

Costa llanisca

Meluerda???

Los tres magníficos nel Altu Teyadera???

Yo cola costa llanisca detrás

Berto y Carlos nel Picu Sorrolles

Cueva Güerta - Braña de las Navariegas (PR AS-156)

2010-01-13T23:55:00.001+01:00

Archivos GPS:

Track: descargar (gpx)

Llugar: Teberga
Duración: 6-7 hores
Puntu de salida: Cueva Güerta
Desnivel: 900m
Dificultá: Media

   Mui cerca del pueblu de Fresnéu (Teberga) alcuéntrase Cueva Güerta ó Cuagüerta como dicen los teberganos, que ye una deformación kárstica onde s'alluga una colonia bien bayurosa d'esperteyos y ye la segunda n'estensión d'Asturies depués de la de la Rede de Toneyu (Amieva). Dexamos el coche nel aparcamientu del área recreativa de Cueva Güerta. Como curiosidá voi apuntar que nós, dimos con esta ruta por casualidá, ya que díbemos cola intención de subir al picu Ferreirúa dende'l Puertu Ventana, pero'l temporal que dieron anuncia adelántose unes hores y nun pudimos llegar al puertu.

   La ruta tá marcada na mayoría de los sitios. Entámase subiendo progresivamente pasando per una viesca bien guapa con tola fueya pel suelu hasta un cruce nun altu, onde hai que xirar a manzorga pa llegar al pueblu de la Foceicha, con un guapu llavaderu y un bon conxuntu d'horros que mos fai prestosa la parada pa garrar un poquiñín d'aire. Nel propiu pueblu hai cartelos que mos indiquen per onde continúa el camín, concretamente hai que garrar el que sal pela parte alta del pueblu hacia la izquierda.

   Depués d'un cachín medio llaneando y en baxada alcontramos un cruce onde garramos el camín de la mandrecha y que entama a subir de forma progresiva, anque dura por momentos. Pasamos la viesca de La Fervienza que tien un encantu especial por ser un llugar mui solitariu y escuru al empar cola ñeve cayendo enriba nós. A partir d'equí vamos ver a la izquierda delles cascaes que componen la Cascada del Xiblu. La parte final ye la más dura, con dalgunes zones empedraes pero con un fuerte desnivel. A la fin, depués del esfuerzu algamamos la Braña de las Navariegas, a 1600m d'altor. La vuelta fadrémosla pel mesmu camín.

Caminando pela viesca antes de llegar a La Foceicha

Berto y Simón en La Foceicha

Cartelu enantes de llegar a la viesca La Fervienza

Na viesca de La Fervienza

Braña de Las Navariegas

Espectacular paisaxe serondiegu

Tuiza Riba - Peña Ubiña (2417m)

2010-01-12T23:46:00.000+01:00

Archivos GPS:

Track: descargar (gpx)

Llugar: L.lena
Duración: 6 hores
Puntu de salida: Tuiza Riba
Desnivel: 1200m
Dificultá: Alta

   La Peña Ubiña o Pena Ubina como dicen na zona ye la montaña por escelencia del macizu de Les Ubiñes. La caminata va entamar nel pueblu de Tuiza Riba , a 1200m. A Tuiza llégase dende Campumanes garrando la carretera LN-8. Otra alternativa pa subir a Peña Ubiña ye facela dende'l Puertu La Cubilla, que ye menos pindia pero un poquiñín mas llarga.
   Entamamos el percorríu pela pista que sal de la parte alta del pueblu. Esti camín empobínamos directos al refuxu de Vega de Meicín. Esti percorríu ye compartíu con otra escursión que ficimos hai bien pocu: la subida a Los Fontanes.
   El refuxu sírvenos pa un pequeñu descansu y reponer fuercies ó atechanos un poquiñín de la lluvia como mos pasara a nós. Dende equí vamos ascender d'una manera fuerte enforma hasta llegar al Altu o Colláu de Terreos, llende ente Lleón y Asturies, ónde podemos ver a manzorga Ubiña la pequeña y Peña Cerreos.
   La ascensión final fadrémosla de la forma más directa posible, que ye pela canal que tenemos delantre nós, coincidiendo cola cara Este de la Peña. Tamién pue facese la ascensión rodiando la peña hacia la izquierda y subiendo pela cara Sur, que ye más facilino y ye per onde lo fae la mayor parte la xente. Hai que dicir que la ascensión pela Canal ye dura abondo y dalgo peligrosa. Hai que tener curiau de que nun argayen piedres pola seguridá de los que vienen per detrás.
   A la fin llegamos a la cume depués d'un esfuerzu fonderu. Les vistes son impresionantes, paezte que tás tocando'l cielu, y nun tamos tan lloñe ya que tamos a 2417 metros. La vuelta fadrase pel mesmu sitiu. Nel mio casu baxe pela otra parte de la Peña, pela cara Sur, que ye más progresiva y asina evites baxar pel pedreru.

Preparaos pa salir

Enfilando la subida al Colláu Terreos

Subiendo pela Canal y con cara de mala ostia

Na cume

Vistes perguapes

Puertu Vegará - Picu Faro - Picu Güevu (2150m)

2009-12-16T22:33:00.003+01:00

Archivos GPS:

Track: descargar (gpx) / descargar (plt)

Llugar: Ayer
Duración: 5 hores
Puntu de salida: Puertu Vegará
Desnivel: 500m
Dificultá: Media

La salida d'esta ruta ye dende'l Puertu Vegará, puertu malpenes conocíu y que tá ente los perconocíos puertos de San Isidro (puertu Braña) y Payares. La forma más directa de llegar dende Asturies camiento que ye garrando una carretera dende Col.lanzo y la última parte ye de pista de tierra. Nós, fuimos per Payares y desviámonos en Vil.lamanín. Tardamos unes 2 hores dende Xixón.

Nun ye esta una caminata que tenga una dificultá grande pa ún que tenga'l vezu de caminar más o menos con frecuencia. Al pocu de salir del puertu Vegará, más concretu dende un sitiu onde hai un edificiu mediu en ruines que nun sé si antaño fore un refuxu o dalgo asemeyao desviámonos a manzorga pa dir ente llamargues y subiendo progresivamente per un sitiu onde nun haí camín definíu dafechu pero que si lleves bien la orientación nun tien perda. Como se verá nes semeyes teníemos una borrina abondo espesa y pocu se podía apreciar del camín.

Darréu, el cielu diba espeyando y ya pudieron vese les peñes del Faro delantre nuestro. Quédamos lo más duro de tou, que ye la ascensión final. Hai que subir hasta'l colláu que tá a mandrecha del cordal según miramos pa elli. Una vez nel colláu, xiramos a manzorga pa empobinar la ascensión final. Primero llégase al Faro (2106m) , y dende ellí, a quince minutinos si nun recuerdo mal vamos crestiando y llegamos al Picu Güevu (2150m).

La vuelta pue facese pel mesmu sitiu. Nós nun fóremos pel mesmu lláu esactamente, sinon siguiendo'l cauce del ríu hasta dar cola pista que va al puertu.

Nel puertu Vegará

Cola borrina enriba nós

Paradina de la subimos

Espeyando, ya se ve El Faro

Nel Faro

Vistes colos Picos al fondo

Más vistes

Nel Picu Güevu

Sotres - Vega d'Urriellu (1930m)

2009-10-26T21:25:00.001+01:00

Archivos GPS:
Track: descargar (plt) / descargar (gpx)

Llugar: Cabrales
Duración: 6 hores (3h subida / 3h baxada)
Puntu de salida: Sotres
Desnivel: 1000m
Dificultá: Baxa

Percorríu

La salida d'esta preciosa excursión fáise dende Sotres, más concretamente dende la curvona enantes de llegar. Ehí pué vese una pista que sal a mandrecha. Muncha xente mete el coche per esta pista hasta llegar a Pandébano, pero yo refugo esta opción por tratase d'una pista d'usu ganaderu.

Garrando esta pista que va ganando altor en tou momentu solo mos da tregua en Pandébano, un sitiu perguapu que de xuru que tá estráu de coches y onde vemos el colláu al fondo . Equí ye un bon sitiu pa facer una parada y garrar puxu pa lo que vien darréu.

Si atravesamos el colláu llegaríemos a Bulnes, pero nun ye'l nuestru destín, asina que garramos el camín que sal a la izquierda del colláu en dirección a les cabañes. A partir d'esti momentu el camín nun tien pérdida nenguna y casi siempre subiendo va empobinamos a la base de "El Picu" ó Picu Urriellu y onde tá el refuxu de Vega d'Urriellu. Dexar fuercies pa la última parte, la que sube al refuxu, porque ye pindia abondo, anque la reconmpensa ye pergrande, y ye que esa mole enriba tuyu nun se ve tolos díes. Ya solo queda disfrutar de les vistes y volver pel mesmu camín.

Diendo hacia Pandébano

Colláu de Pandébano

Vista de Bulnes

Vista del Picu

Celebrando la llegada a Vega d'Urriellu

Refuxu de Vega d'Urriellu

La mole

Tuiza Riba - Picos del Fontán (2414m)

2009-10-09T00:38:00.007+02:00

Archivos GPS:
Track: descargar (plt) / descargar (gpx)
Waypoints: descargar (wpt)
Mapes: descargar (zip)

Llugar: L.lena
Duración: 6 hores (3,5h subida / 2,5h baxada)
Puntu de salida: Tuiza Riba
Desnivel: 1200m
Dificultá: Media - Alta

Percorríu

A Tuiza dende Asturies llégase al traviés de Campumanes. Hai que garrar la carretera LN-8 hasta topar con Tuiza Riba depués de pasar Tuiza Baxu. Hai bon aparcamientu pa dexar el coche.

Namás salir ya mos empobinamos con una pendiente constante y per un camín de ganao Vega de Meicín que sedrá la primer parada. Nesti camín acolumbramos al fondu Peña Ubiña. Dende'l refuxu (1545m), si miramos en dirección SO vese un colláu que ye onde se tendría que llegar si subiéremos a Peña Ubiña. Pero nesti casu en dexando a manzorga el refuxu de Vega de Meicín (mui feu por ciertu) diremos dirección NO pa llegar a un altu que ye la Forqueta del Portillín (2049m). Hai que dicir qu'esti percorríu ye pindiu abondo y cá ún tien de facelu al so ritmu, ya que nun toos tenemos el mesmu fondu físicu.

En llegando a la Forqueta del Portillín facemos un merecíu descansu mientres se mos respiga'l pelleyu, y nun solo por fríu sinon poles grandioses vistes. Amás, ya podemos ver los picos de los Fontanes, el nuestru oxetivu.

A partir d'esti momentu llega la parte más difícil, más rocosa y cola que hai que tener más miramientu porque nun ye apto pa tolos públicos.

Cruciamos la Forqueta y vamos caminando con cuidau peles lladeres de los picos del Portillín y del Crestón del Pasu Malu ensín ascender pero ensín perder altura. Barruntamos que too esto pudiere haber sido un antiguu glaciar. Sólo son conxetures.

En llegando a la base del Canalón del Buey (ó Canalón del Güe n'asturianu) entainamos la subida pela canal bien pegaos a la parede izquierda pa dir garrándonos a la roca nes zones más complicaes. Ye MUI IMPORTANTE que la xente faiga la subida al so ritmu y mirando pa la xente que tien debaxo porque ye mui fácil qu'argayen piedres col consiguiente peligru pa los que tán en baxu.

En cuantes que lleguemos arriba del Canalón del Buey vamos tar frayaos de tanto subir y de la concentración de facer les coses bien pa nun ponenos en peligru a nós nin a los que vienen per detrás. Pero acolumbramos unes vistes perguapes de Lleón y de los montes d'Asturies. Tamos na llende.

Agora quédamos el caberu repechín que vamos superar ensín muncha dificultá pa topar primero el Fontán Sur y darréu, unos metros más p'alante finaremos el percorríu d'ida nel Fontán Norte.

P'acabar namás dicir que fuimos con unos collacios vascos que diben como motos y que mos costó asgaya siguilos. Mándo-yos dende equí un abrazu.

Subidendo a la Forqueta'l Portillín

Peña Ubiña al fondu

Vista del refuxu dende la Forqueta'l Portillín

Vista de los Fontanes dende la Forqueta'l Portillín

Canalón del Buey

Fontán Sur

Summer Solstice

2009-10-04T23:46:00.000+02:00

Collada d'Ixena - Picu Mofrechu (900m)

2009-06-01T01:00:00.000+02:00

Archivos Oziexplorer/CompeGPS:
Track: descargar (plt)
Mapes: descargar (zip)

Llugar: Cangues d'Onis / Ribesella
Duración: 3 hores (1h 40' ida / 1h 20' vuelta)
Puntu de salida: Collada d'Ixena

Recorríu

Pa llegar a Ixena dende Xixón hai que llegar a Nueva(conceyu de Llanes) y ehí desvíase pela carretera AS-340 en direición a Rinsena (hai un cartelu que lo indica). Pocu depués de pasar Rinsena dexamos el coche nuna cuneta xusto onde sal un camín formigonáu en direición al monte. Hai un cartelu nun árbol que señala l'entamu de la ruta al Mofrechu.

Namás salir hai que dir a la mandrecha y pasar una portiella. Depués, más alantre vamos atopar una segunda portiella. Al pocu, el camín sedrá caleya de monte, anque ye bien amañosu pa dir cómodu andando y con poca pendiente que nun se fai dura n'escesu. Tan sólu hai que llimitase a siguir el camín, que nun tien perda denguna. Les vistes de Picos d'Europa que vamos viendo na subida son perguapes con un contraste intensu del verdor de los praos y la ñeve.

En llegando a la mayá de Güeses el terrén danos un descansu, dexa de ser cuestu por un peazu. Pocu depués llegamos a otra zona de cabañes que se llama Vega La Fuente. Siguimos con el camín en pendiente pa llegar pocu depués a Vega Maor con una placa conmemorativa a un guarda fallecíu. Ya acolumbramos la peñona del Mofrechu que la tenemos delantre los güeyos. Sólo mos queda enfilar un peacín más el camín, nel que atopamos una manada de vaques y xatos tapando el pasu. La subida al picu facémosla pel sitiu que más afayadizu vemos pa subir, pero éso ya ye a gustu de cada ún. Arriba del tou atopamos otru grupín de vaques. Ye la primer vez que veo vaques enriba d'un picu, paeciome raro qu'estos animales llegaren tan arriba.

Una vez na cima les vistes son precioses, con Ribesella a los pies, el Pienzu al oeste y los Picos al sur.

Subiendo hacia la mayá de Güeses

Vista de Ribesella

El que vos fala, colos Picos al fondu

Vista de los Picos

Los cuatro montañeros

El Pedrosu - Picu Hibéu (872 m)

2009-01-15T23:33:00.000+01:00

Archivos Oziexplorer/CompeGPS:
Track: descargar (plt)
Mapes:descargar (zip)

Llugar: Onís
Duración: 5 hores
Puntu de salida: El Pedrosu

Recorríu

Dexamos el coche llueu de pasar El Pedrosu, nuna zona que llamen Carapelu, enantes de llegar a Fresnéu.
Hai un camín que sal a la izquierda. El nuestru oxetivu ye garrar una senda que mos empobina al Hibéu, asina que tenemos que dir en direición a les torres d'alta tensión que vemos al fondu. Al pocu salir pasamos per de llau d'una casa y atravesamos la portiella. Tenemos que siguir pel camín, que más alantre s'acaba y atravesamos un prau que tien una cabaña pa saltar depués una llende y subir un poquiñín per ente una zona d'árboles y salir definitivamente a la senda que tábemos buscando. Garrando esti camín hacia arriba ya nun tien perda nenguna hasta llegar a Los Llanos dexando atrás el picu Cabeza Bustiellu(754m), onde podemos facer un descansín enantes del sprint final. Podemos paranos a contemplar tol paisaxe ñevao ante nós, l'imponente Tiatordos destaca al suroeste, el Urriellu tamién lu podemos ver con claridá, y en baxo nós tol valle ñevao. Tenemos ante nós la hermosa peña caliza del Hibéu(872 m), galana y pergrande. La ascensión final podemos facela por varios sitios. Nós, escoyimos entamar la subida a la altura d'un llagu que nestos momentos taba xeláu. La subida cuéstanos un pocu porque tamién tenemos l'inconveniente de la ñeve que mos fai patinar,pero merez la pena poles precioses vistes que mos allumen la vista. Vemos tola costa llanisca, los picos d'Europa que paez que los podemos tocar y el cordal del Sueve. La vuelta facémosla pel mesmu camín.

Panorámica vista Picos

Cola Peña Hibeu al fondu

Vista Tiatordos

Enriba l'Hibéu

Descendiendo pel Hibéu

Villabre - Picu Caldoveiru (1354 m)

2008-11-23T21:29:00.000+01:00

Archivos Oziexplorer/CompeGPS:
Track: descargar (plt)
Mapes:descargar (zip)

Llugar: Yernes y Tameza
Duración: 5 hores
Puntu de salida: Villabre

Recorríu

Averámonos esta vegada al conceyu de Yernes y Tameza, una fastera que tengo mui pocu pateada. Esta ruta foi idega d'un collaciu del grupu cuyos pas son de per equí. Entamamos a caleyar dende'l pueblu de Villabre, al que se llega dende Grau, garrando la carretera AS-311 en direición a Yernes y Tameza.

Salimos de la plaza del pueblu onde tá l'ayuntamientu. Namás salir del pueblu garramos un camín que va paralelu al ríu. Estos díis taba mui embarrau, menos mal que díbemos bien preparaos con botes fuertes. Esta zona ye perguapa, con muncha viesca, con ablanos y demás especies autóctones. Depués de menos d'una hora de tar caminando llegamos a un puntu onde tenemos que dexar el camín y cruzar el ríu. Equí entama la parte más dura y menos prestosa del recorríu, abandonamos la viesca y metémonos de llenu nuna lladera con fuerte pendiente y onde'l camín malpenes ta marcáu. Ye lo que llamen Aguafontes. Hai que tener munchu cuidau nesta parte porque ye perfácil perdese. Gracies que llevábemos con nós el gps porque si non, de xuru que mos hubiéremos perdío. Depués de subir un cachu, a la fin atopamos un camín que ya mos empobina a El Castichu que ye un sitiu mui guapu, de prau pa'l ganau y rodiau de peñuques y onde'l desnivel mos da una tregua. Ye un bon momentu pa facer un descansu y disfrutar de la vista.
Si siguimos caminando llegamos a los llagos (más bien regatos) de Trescadupo. Equí ya damos un xiru a la mandrecha y enfocamos direutamente la subida al Caldoveiru, anque dende equí nun lu vemos entá. Pero namás que subamos el repechín que tenemos delantre nós, habremos algamao la cima del Caldoveiru. La vuelta facémosla pel mesmu llau.

El Castichu

Caldoveiru

Ruta de los 3 Llagos de Cuadonga

2008-11-19T22:34:00.000+01:00

Archivos Oziexplorer/CompeGPS:
Track: descargar (plt)
Mapes:descargar (zip)

Llugar: Picos d'Europa (macizu ocidental)
Duración: 3 hores
Puntu de salida: Llagu Enol

Recorríu

Nun día galvanosu, con mal tiempu ó cenciellamente que ún quier disfrutar del paisaxe, la ruta que vos propongo darréu ye una alternativa mui acertada.
Ye'l primer día de payares ó día de los difuntos y ya podemos ver los llagos de Cuadonga con un mantu blancu. Una postal preciosa.
Partimos del llagu Enol en direición al área recreativa Buferrera, garramos un camín asfaltau que pasando pela antigua mina de Buferrera empobínanos al llagu Ercina.
Rodiamos el llagu Ercina pela manzorga coyendo un cachu del camín que va Vega d'Ariu, pero sólo mos averamos a La Veguina, pa siguir depúes rodiando'l llagu pela so parte sur en direición a Les Reblagues. Esti tramín ye mas cuestu y llévanos ensín perda nenguna al llagu el Bricial, más pequeñu n'estensión que los otros dos pero con otru encantu, ya que queda más arrequexau. Llueu vamos pasamos peles cabañes del Bricial, y ye a partir d'agora la parte más difícil de siguir porque hai que tar atentu de nun siguir les marques que mos lleven pa'l Mirador d'Ordiales. Siguimos les marques hasta la zona que llamen La Escampada. Equí empobinámonos en direición NO y pronto atopamos un regatu que podemos siguir hasta llegar a Vega d'Enol. Nesti puntu continuamos pela carretera hasta el llagu Enol.

Llagu Enol

Área Recreativa de Buferrera

Llagu El Bricial

Vega d'Enol

Vista dende Vega d'Enol

Llagu Ercina - Vega d'Ariu - Picu Jultayu (1940m)

2008-10-26T21:07:00.000+01:00

Archivos Oziexplorer/CompeGPS:
Track: descargar (plt)
Mapes:descargar (zip)

Llugar: Picos d'Europa (macizu ocidental)
Duración: 7 hores y media
Puntu de salida: Llagu Ercina

Recorríu

Dexamos el coche nel aparcamientu del llagu Ercina (el de más arriba de los llagos de Cuadonga). Entamamos a caminar dexando a la mandrecha el llagu per un camín bien marcau y con un cartelu que mos indica l'aniciu de la ruta vega d'Ariu.

Esti camín nun tien perda nenguna. Va ser un continuu sube y baxa, terrenu rompepates onde los haya pero con unos paisaxes y unes vistes casi que de cuentu. Entamamos con un camín un poquiñín embarrau pero que depués va tar mui bien y que pué facese dafechu con unos playeros fuertes ensin falta de botes de montaña. Al pocu pasamos pela Vega El Texu. Depués d'un cachín y ensín desvianos de la caleya atopamos unes cabañes con ganau paciendo, que ye la mayá de Les Bobies. Nesti puntu tenemos el gustu de divisar unes vistes precioses de toles cordaleres de la zona y la mar al fondu cola imponente sierra del Sueve que mos sirve d'orientación.

Pocu depués comenzamos una zona con una dura subida que se llama Las Reblagas y que culmina nun altu conocíu como Las Campizas.
Nesti puntu ye necesariu un descansu. Más alantre, siguiendo les marques blanca y amariella de la ruta llegamos al colláu El Jitu. Agora ya tamos mui cerca de Vega d'Ariu, atopamos un cartelu que mos indica qu'el refuxu del Marqués de Villaviciosa (ilustre personaxe asturianu, cuyos restos descansen nel Mirador d'Ordiales) tá mui cerca. Alcontramos una mesa de piedra con indicaciones de tolos picos que se puén ver dende esti puntu. Caminamos un poquiñín hacia una zona de praos con ganau que ye Vega d'Ariu.

Culminamos depués de poco más de dos hores la primer parte del recorríu. Agora quédanos lo más duro, que ye subir al picu Jultayu que lu tenemos delante nós, ye el picu más cercanu que vemos. Vamos averándonos a él siguiendo les señales que mos orienten pa la Canal de Trea, pero en seguida vamos perder de vista estes señales, ya que van empobinaes al Cares, y el nuestru oxetivu ye dir haza'l picu Jultayu. Tenemos entós qu'orientanos agora polos jitos que vamos alcontrando pel camín y que nun tienen perda nenguna y mos lleven directamente pa la parte pela que ye más llóxico entamar la subida. A medida que vamos subiendo siempre tenemos que dir orientándonos polos jitos que vamos alcontrando que mos empobinen direutamente a la cima del Jultayu depués d'una subida abondo dura pero que nun mos impide llegar bien a la cima con unos playeros fuertes ensin falta de botes.
Ya enriba, les vistes nin que decir tien que ye pa dexar ablucau a cualquiera, y yá cuando mires p'abaxo y ves xusto debaxu el pueblu de Caín con una caída de más de 1000 metos en picau da más que respetu. En resumen, un sitiu increyible.
La vuelta facémosla pel mismu sitiu, y en total son algo más de 7 hores.

Aniciu de la ruta

Zona de Les Bobies

Vega d'Ariu

Vista dende Vega d'Ariu

Vega d'Ariu

Jultayu

Panorámica dende'l Jultayu

Carrandi - Puertu del Sueve (PR. AS-70)

2008-10-15T23:32:00.000+02:00

Llugar: Colunga
Duración: 4 hores
Puntu de salida: Carrandi

Esta ye una ruta que pué facese un díi que ún nun quier dir lloñe y amás tá bien indicada pela mayor parte los sitios. Déxase'l coche na plaza'l pueblu de Carrandi, onde ta la ilesia y una antigua escuela. Ellí veremos un cartelu informativu de la ruta.
Entámase baxando hasta lo que llamen el Prau Grande, pasamos una casería y ya en seguida entamamos la subida. El camín tá perfeutamente señalau en tou momentu coles pintaes blanca y amariella que mos indica que vamos bien. En pasando una casería nel llugar conocíu como Brañalagata ya mos metemos a un camín de fuerte subida y bien embarrau a pesar de que fai tiempu que nun llueve con ganes. Salimos depués a una zona más despeyada onde ya tenemos una vista bien guapa de la costa.

Cuetu El Toyu

Pasamos la portiella de Cuetu el Toyu y siguimos subiendo per una zona de praos que ye la mayá de Busfríu con vaques paciendo hasta llegar a una esplanada onde a nuesta mandrecha tenemos una peñuca que se llevanta, que ye el Picu Sol de Miguel, y a nuestra izquierda, el picu que se llevanta ye el Picu Cordobana, más grande y vistosu esti caberu. Nós, vamos subir al picu Sol de Miguel, onde hai una piedra onde vienen indicaos los pueblos del conceyu de Colunga y la orientación de pa onde queden. Ésta placa tien el nome de Víctor Manuel Villar Pis, que ye ún de los grandes conocedores del Sueve y el creador de varies rutes por esta máxica cordalera d'Asturies.

Mayá de Busfríu

Nel Picu Sol de Miguel (444 m)

VIsta de Llastres

La baxada vamos facela pel otru llau. Hai que tener cuidau nesti puntu porque ye fácil confundir la baxada. Hai que buscar siempre les pintaes de la ruta. Da la casualidá que vemos una nuna piedra y siguimos esa direición pa baxar per una zona onde'l camín nun tá mui marcau, ente felechos secos y cotolles hasta llegar abaxo onde tá la Riega La Matona. A partir d'esti momentu el camín nun tien perda denguna. Siguímoslu pasando pela fuente de Caspiulabarra, la cabaña de la Cueva, vemos pequeños acebos a los llaos, cruzamos depués el ríu espasa pela zona que llamen "Prau del Ríu" y ya entamamos a subir a Carrandi de nueu. La vuelta taba más embarrada entá y les vistes na subida y baxada nun fueron buenes precisamente. Sálvase sólo la zona más alta, que yera una zona mui guapa y con una bona vista de la costa de Colunga.

Peña Mea (1557 m)

2008-09-28T23:44:00.000+02:00

Archivos Oziexplorer/CompeGPS:
Track: descargar (plt)
Mapes:descargar (zip)

Llugar: Llaviana
Duración: 4 hores
Puntu de salida: Ermita Les Campes

Recorríu

Ye esta una ruta perconocía ente los montañeros. Peña Mea ye un altu emblemáticu y un bon mirador de tolos cordales d'Asturies pola so amañosa situación de la fastera cental d'Asturies.
Entamamos la caminata na Ermita Les Campes a la que se llega al traviés de Tolivia garrando el desvíu de la carretera que va pa Fresneo y siguiéndola hasta la Ermita Les Campes. Ehí dexamos el coche.
Coyemos el camín que sigue nel sentíu de la carretera pela qu'acabamos de llegar y depués d'un cachín atopamos una dixebración del camín, per un llau váse pa la Collá Doñango y pel otru pal colláu de Pelúgano. Ye esti últimu'l que vamos garrar.
Na mio opinión ye más afayadizo dir per esta parte porque al entamun nun se sube tanto de sopetón. La subida ye suave hasta'l Colláu de Pelúgano. Como digo, gárrase una pista que mos empobina hasta'l Colláu de Pelúgano y que pasa pel Llanu Pachín onde atopamos una casa bien guapa y que mos sirve de referencia pa saber que vamos bien.

Colláu de Pelúgano

Cuando llegamos al Colláu de Pelúgano dexamos la direición que llevábemos hasta'l momentu y tornamos a la manzorga en direición Este pa coyer una caleyuca que sube pel prau p'arriba pasando peles cabañes de Cerreo. Un pocu depués ya entamamos la perdura ascensión pela famosa Canal del Güeyu de Güe (Canal del Ojo de Buey) hasta llegar a esa roca afuracada tan conocía del mesmu nome que la Canal pela que vinimos.

Na Canal del Güeyu de Güe

Güeyu de Güe

Depués d'unes obligaes semeyes y un merecíu descansu en tan emblemáticu monumentu natural continuamos caleyando la cabera parte de la ascensión. Sólo mos queden 200 metros de subida pa llegar al nuestru oxetivu. El sentíu común va llevanos casi pel únicu sitiu pel que ye posible la ascensión siguiendo una caleya que mos empobina de cabeza a la cima de Peña Mea (1557 m) depués de 2 hores de dura caminata. Dende esti altu contemplaremos gran parte de la montaña asturiana: el macizu les Ubiñes, la sierra L'Aramu, el cordal de Peña Mayor, el Sueve, el Tiatordos y los picos d'Europa ente otres.

Vista dende Peña Mea

El camín de vuelta fadrase per otru llau. Descendemos la peña en direición Este, vamos siguir tol tiempu una caleya que mos llevará con fuerte desnivel per una zona d'árboles y vexetación, un sitiu bien prestosu y con solombra hasta llegar a la collá Los Palomos. Ehí ye un sitiu afayadizu pa facer un descansu y continuar de nueu descendiendo hasta llegar a la collá de Doñango pasando per una zona bien abierta y baxando ente praos. Nesti sitiu ya garramos una pista que mos empobina ensín perda denguna hasta la ermita Les Campes.

Toos na Collá Los Palomos

La duración total foi de 4 hores, el día que tuvimos soleyeru y les vistes precioses. Una ruta que nun da malpenes respiru pol desnivel que tien pero que nun ye llarga y faciéndola selemente pué resultar mui prestosa.

Borrar parte de un track con oziExplorer

2008-09-25T23:47:00.000+02:00

Como es de esperar, oziExplorer permite la edición de tracks. Es muy frecuente, al menos a mí me pasa, que el gps al conectar genere puntos de track inválidos que equivalen a líneas que se salen del recorrido que hayamos hecho. Por eso es muy interesante poder borrar puntos de un track.
Para ello, con el track cargado, hay que ir a: Ver --> Tracks --> Control de Tracks . Ahora ya tenemos la ventanita que nos muestra los tracks que están cargados. El cuarto botón nos permitirá seleccionar los puntos de track en el mapa, y con el octavo los borraremos, tal y como muestra la imagen.

Ruta Angliru - Gamonal (1712m) - Moncuevu (1725m) - Gamoniteiru (1791m) - Angliru

2008-09-22T22:33:00.000+02:00

Archivos Oziexplorer/CompeGPS:
Track: descargar (plt)
Mapes: descargar (zip)

Llugar: Sierra de L'Aramu
Duración: 7 hores
Puntu de salida: L'Angliru (Riosa)

Esta vegada averámonos a L'Aramu a modu d'entrenamientu pa la temporada de monte que vamos entamar darréu. Ye una ruta abondo llarga y que obgliga tar en bona forma.
Depués de dexar el coche nel Angliru, empobinábamos haza'l primer picu del díi. Trátase de la Gamonal, y podemos velu al llau nuestru, ye fácil identificalu pol pivote que tien enriba. Nesti momentu tamos frescos y facémoslo rápido. Caminamos en direición NO baxando al valle Xiniestru y pronto algamamos la cima (30 minutos).

Vista Gamoniteiru dende'l Gamonal

Facemos unes semeyes a la preciosa vista y entamamos el descensu. Nuestra meta agora sedrá la cima del Moncuevu. Baxamos per onde mos pete y más facilino lo veamos, y empobinámonos agora en direición SO pasando al llau del llagu o charca de Fonpedrín. Una vez equí entamamos la subida al Moncuevu. Ye una subida dura, como les tres ascensiones que mos toquen güei, anque yo atreveríame a dicir qu'esta ye la más dura de toes. Depués de salvar un desnivel bien fuerte, cuando temos na base de la cima, hai que rodiar ésta en direción E per un pasu que alcontramos a la manzorga y el caberu cachín que mos queda por subir fadrémoslu trepando un poquiñín ente les piedres hasta llegar arriba. Ya tamos na cima del Moncuevu (2h 15min). Hai que reconocer que ye una cima fea, con delles yerbes seques y ensín denguna señal que mos diga onde tamos.

Nel Moncuevu

El descensu complicósenos enforma. Punxímonos a baxar pela parte Sur, y la verdá seya dicha que taba un pelín peligroso, teniendo que baxar buena parte del recorríu col culu pegáu a les roques. Nun aconseyo baxar per esta parte, quicias seya mas facilino pela parte Este.
Una vez en baxu, y cola sudada que garramos, tócanos agora enfocar el Gamoniteiru, el caberu picu del nuestru recorríu. Dexamos a la nuestra mandrecha la braña de Vallongo y caminamos en direición S pel valle del mesmu nome. Depués d'un cachín entamamos a subir progresivamente la lladera que tenemos a la manzorga, que ye la parte oeste del picu Barriscal. Si ún se ve con fuerces, pué probar a subilu. Nós nun vamos facelo esta vegada porque entá mos queda un buen cachu pa finar la ruta. Darréu vamos ver al fondu el picu Gamoniteiru cola inconfundible antenona enriba la cima.

Vista del Gamoniteiru

Caminamos ya enfocando directamente el picu y pasamos pela mayá de La Florida, pero la subida fuerte vamos facela rodiando un poquiñín en direición Este la base del Gamoniteiru pa subir per una parte que ye prau, ensin roques nin ná y que a nuestru paecer ye la parte más fácil. Depués de subir un cachín y bastante cansaos de tolos kilómetros y subides que llevamos enriba nós, atopamos una pista de tierra que mos ayuda na subida final. Al llegar arriba vemos que hai hasta una carretera per onde suben coches y que llega hasta la cima. Lo nunca visto. Algamamos por fin la cima del Gamoniteiru (4h 30min).
El recorríu de vuelta facémoslu por un camín dalgo estremáu del de ida, rodiando pel otru llau el Barriscal. En cuantes que baxamos del Gamoniteiru caminamos en direición N pasando pel Xugu La Bola, rodiamos pela mandrecha el picu Barriscal y llegamos al Llagu de Robles. Dexamos agora a la manzorga unes cabañes con ganau paciendo. Ésta parte nun tuvimos mui acertaos, por querer evitar subides innecesaries dimos un rodeu pergrande. Nesti puntu yera meyor dexar estes cabañes a la mandrecha, llámase esta zona si nun digo mal, La Veguellina. Sólo mos queda caminar en direición NO pol sitiu mas afayadizu que veamos y llegaremos ensín problema dengún al puntu de partida, que nun ye otru que'l perconocíu Angliru (7 hores).

Búsqueda de mapas con CompeGPS Land

2008-09-16T23:31:00.000+02:00

A diferencia de OziExplorer, CompeGPS Land no dispone de una funcionalidad específica de búsqueda de mapas en tu propio ordenador a partir de unas coordenadas.
CompeGPS es un software de navegación 'Off Road', es decir, orientado a la navegación gps por caminos, montaña,... pero no precisamente para carretera, aunque también se podría usar para este fin.
Yo estoy usando la versión 6.6, y cuál fue mi sorpresa al descubrir que no tenía una funcionalidad que te permita buscar mapas a partir de unas coordenadas, tal y como se hace en oziExplorer (para ver el procedimiento en ozi pulsa aqui).
Para conseguir algo parecido con Compe hay que hacer lo siguiente:

1/ Configurar carpeta de mapas:

Ir a Archivo --> Opciones... --> Mapas --> Carpeta de Mapas. Agregar las rutas locales donde se encuentren los mapas que tengais para compeGPS.

2/ Crear waypoint con las coordenadas:

Ir a Waypoints --> Nuevo Waypoint. En la línea que pone 'coordenadas' haceis doble click e introducir las coordenadas. En tipo de coordenadas escogeis el formato, lo normal será 'Lat/Long' (en grados) ó 'Proyección UTM'.

3/ Buscar mapas para la posición del waypoint:

Vemos que se ha creado un waypoint en nuestra pantalla principal del programa. Si dais al botón derecho sobre él, sale la opción de 'Buscar mejor mapa aqui'. Ésta opción te busca en todas las rutas que hayas establecido en el paso 1. Si encuentra algún mapa que coincida con la posición indicada lo abre y listo.

Fiesta l'Asturcón 2008 (El Sueve - Asturies)

2008-08-24T23:00:00.000+02:00

Ésta fiesta, que lleva más de venti años cellebrándose ye básicamente un actu d'homenaxe a un animal autóctonu d'Asturies que tuvo a puntu de desapaecer fai dellos años. L'asturcón ye un animal con muncha hestoria qu'al principiu de los tiempos nun taba mui valorau pero llueu foi descubriéndose la gran resistencia qu'amosaba en condiciones dures, como son les de la montaña. Foi domesticáu pa xeres agrícoles sobremanera.
La fiesta l'asturcón tien llugar tolos años na Mayá d'Espineres, na cordalera del Sueve, n'Asturies. La fiesta componse de xuegos tradicionales, misa al aire llibre, degustación de carne roxa, y lo más importante, un concursu de morfoloxía de caballos asturcones, marcaxe de potros nacíos esti añu, y muestra de doma. Ésto último ye lo más interesante pol fechu de ver cómo unos mozos faen tolo posible por montar esti caballu faciéndose nun par de minutos cola confianza del animal.
Esti festival ta organizáu por ACAS (Asociación de Criadores de Asturcones) y cola colaboración de los ayuntamientos de Colunga, Caravia, Parres y Piloña.

Pa más información sobro l'asturcón dexo estos enllaces:

ACPRA (Asociación de Ponis Raza Asturcón)
El Corru (Criadores d'asturcones)
Ecomuseu Ca l'asturcón (Páxina del ecomuseu del asturcón en Villaviciosa. Información tamién sobro otres races autóctones d'Asturies)

Déxovos dos vidios d'esti guapu certamen:

Doma:

Marcaxe:

Equí van unes semeyes:

Búsqueda de mapas con OziExplorer

2008-08-10T15:40:00.000+02:00

OziExplorer permite buscar mapas correspondientes a un lugar basándose en unas coordenadas dadas en grados ó formato UTM. Esos mapas tienen que estar en una ruta del disco que estará configurada en ozi como se verá mas adelante. Los datos se pueden introducir con latitud y longitud o en formato UTM. A continuación veremos cómo se pueden conseguir estos datos para un lugar concreto.

Imaginemos que queremos obtener un mapa donde figure la villa asturiana Colunga. Los pasos a seguir son los siguientes:

1/ Buscar coordenadas:

Existe una aplicación online que se llama Geografical Coordinates que nos da esta información. Simplemente introduciremos el nombre del pueblo o lugar para el que queramos obtener las coordenadas y listo.
Introducimos el nombre Colunga. Vemos que nos da el resultado en grados (Latitud: 43.48, Longitud: -5.27)

2/ Convertir coordenadas geográficas a UTM:

Vamos a hacer esta conversión debido a que ozi es más preciso encontrando los mapas usando el formato UTM que el de coordenadas geográficas.
Existen muchas aplicaciones gratuitas que nos pueden hacer esta conversión. Yo propongo una aplicación online y otra que simplemente se descarga al pc y no requiere instalación. El sistema de referencia que vamos a usar es WGS 84, ya que la primera aplicación solo hace los cálculos con dicho sistema.

A la primera se puede acceder pinchando aquí

La segunda se puede descargar desde aquí .
NOTA: Para cambiar el sistema de referencia habría que ir al menú SistemaRef y poner WGS 84.

Como vemos, para los datos introducidos nos da una medida de [X:316420.1864 , Y:4816623.2649 , huso horario:30]

3/ Configurar rutas de mapas en Ozi:

Para que ozi busque entre los distintos mapas que tenemos en nuestro pc es preciso indicarle la ruta en la que se encuentran. Para ello hay que ir a Archivo --> Configuración --> Pestaña Sistema. Vemos que hay una opción para especificar rutas de archivos tipo. Ahí le pondremos dónde se encuentran nuestros archivos *.map. Además hay otra opción que es 'Datum Datos Archivo' que es para indicar el sistema de referencia a utilizar. En nuestro caso será WGS 84.

La búsqueda de mapas se hace recursiva, es decir dada esa ruta buscaría en todas las carpetas que hay por debajo.

4/ Búsqueda de mapas a partir de unas coordenadas:

Esta funcionalidad de oziexplorer se encuentra en Mapa --> Búsqueda de Mapas --> Introduciendo coordenadas. Establecemos el Datum a WGS 84, marcamos que los datos se van a introducir en UTM, metemos los datos que tenemos (ATENCIÓN: Los datos se deben meter con coma y no con punto porque ozi protesta) y pulsamos 'Buscar Mapa'.

Si encuentra algún mapa en la ruta que le marcamos en el paso anterior nos mostraría los resultados. Haciendo doble click en el resultado deseado nos abriría el mapa.

Arangas - Picu Turbina (1315 m)

2008-06-02T20:10:00.000+02:00

Archivos Gps pa oziexplorer:
Tracks: Arangas - Picu Turbina (plt)
Waypoints: Arangas - Picu Turbina (wpt)
Mapes: Arangas - Picu Turbina (ozfx3)
Arangas - Picu Turbina (tif)

Llugar: Cabrales - Peñamellera Alta
Duración: 5 hores
Puntu de salida: Arangas de Cabrales. Hai que dir hasta Arenas de Cabrales y ehí coyer una carretera a la manzorga que va hacia Arangas. Hai un cartelu que lo indica. El coche pué dexase cerca de la ilesia, que sedrá el puntu de partida.

ruta

Descripción:
Esta vegada tocó averase al oriente d'Asturies pa xubir al picu mas altu de la cordalera del Cuera, ente los conceyos de Peñamellera Alta, Llanes y Cabrales. Trátase del picu Turbina, con 1315 metros.
El recorríu entamámoslu en Arangas de Cabrales, más concretamente na cuestina que xube per delantre la ilesia. Al principiu caminamos per una pista que pronto la dexamos pa dir per camín de ganao ente praos. Siempre en direción N. Al pocu tiempu dexamos a la mandrecha unes cabañes. Siempre vamos xubiendo con una fuerte pendiente y pol momentu nun perdemos de vista el pueblu de Arangas. Aunque veamos que hai camín que va hacia la mandrecha, lo meyor ye xubir del tirón de frente y más arriba garrar otru camín de ganao que esta vegada sí va hacia la mandrecha. Les peñes que tenemos enriba nós llámense El Cantu. Esti camín llévanos con una pendiente mas progresiva que lo que teníemos hasta agora y depués d'un cachín yá enfila direción N pa pasar ente les peñes que tenemos delantre nós. Ésta zona llámase Entrambos Praos. Depués de xubir esti duru repechín algamamos un cercáu pa'l ganao, ye lo que llamen Cocha Gobiu. Dende equí puen sacase unes semeyes guapes de los Picos d'Europa si la borrina respeta. Al fondu agüeyamos Peña Llacia (1194 m), que tendremos que rodiala pela mandrecha llegando un poco más alantre a la braña Gobiu. Ésta zona llámase Piedra l'Osu.
En pasando les cabañes de Gobiu nun hai pérdida porque ya vamos agüeyar al fondu el Picu Turbina en solitariu con una caseta no alto. A la manzorga vamos dexar una cabaña y los restos d'otres, tamién ye fácil alcontrar vaques roxes paciendo per equí si nun tamos n'iviernu. Pa afrontar la subida final lo meyor ye facelo rodiando un poquiñín hacia la mandrecha y en cuantes que lo veamos afayaizo, tirar p'arriba.

Pivote

Una vegada que temos no alto les vistes pueden ser perguapes si la borrina mos dexa.
El camín de torna fadrase pel mesmu sitiu.

Caseta

Picu La Múa (990 m)

2008-04-21T23:47:00.000+02:00

Archivos Gps pa Oziexplorer:
Tracks: Cabañón - Picu La Múa (plt)
Waypoints: Cabañón - Picu La Múa (wpt )
Mapes: Cabañón - Picu La Múa (zip)

Llugar: Nava
Duración: 4 hores y media
Puntu de salida: El Cabañón (Molín de Fraynoquiso), mui cerquina de la embasadora d'agua Fuensanta. Pa llegar a esti puntu hai que garrar el desvíu de la carretera NA-1 dende la N-634, y a los pocos metros tópase un desvíu a la manzorga onde hai unos cartelos de cases rurales y un cartelu qu'indica el molín de Fraynoquiso. El coche dexarase xustu dempués de pasar la ponte onde tá el molín.

Descripción:
Como toles rutes, ésta tamién pué facese per estremaos caminos. Nesti puntu de salida pués dir hacia l'este o hacia l'oeste. Nós, fuimos hacia l'este, caminamos un cachín cortu per carretera y al pocu llégase al pueblu de Cueva Alta (ó Cueva d'Arriba), atravesamos esti pueblu y enfilamos una zona de pinu, siempre xubiendo con desnivel abondo. Primero vamos topar un puntu con un desvíu a la manzorga y otru a la mandrecha, el nuestru camín ye'l d'en mediu, y un cachín dempués atopamos otru desvíu, nesti casu vamos coyer el de la mandrecha, que ye el que mos empobinará a la fin a un altu onde había unos potros y tamién hai una señal qu'indica que vamos bien. Hai que dicir que'l ríu Pendón siempre queda a la nuestra mandrecha anque nun se vea.
Ye'l momentu de parar pa tomar un aperitivu dempués de tan llarga y dura xubida. Dende esti puntu, tenemos una vista mui guapa de tola fastera oriental d'Asturies. Podemos ver los Picos d'Europa, los cordales costeros del Sueve y el Cuera, y tolos montes de Piloña. Pela otra mano vemos tol cordal de Peña Mayor, que lu tenemos tan cerquina que casi paez que lu podemos tocar.

Crestes de Trapa

Agora hai qu'enfilar tolo que llamen les crestes de Trapa, lo que mos queda ye dir crestiando per toles estribaciones que vamos alcontrando. La primera tenémosla delantre de nós, xubimos del tirón el repechín esti y llueu ye tol camín dir asina peles crestes. Hai que destacar que vamos dir atopando dapoco palos indicativos de que vamos bien, cosa que la verdá seya dicha, da muncha seguridá cuando tase metíu nel monte.
LLegamos al pocu al Colláu La Verde, ye esti un puntu de xunión con otru camín que vien pela nuestra mandrecha, dende les cabañes de Brañabérnez, y ye'l que vamos siguir pa la torna.
Un pocu mas alantre atopamos una llagunina y a la fin xubimos l'últimu repechín que tenemos delantre nós y a la mandrecha ya tá el Picu La Múa que tien un picu a mou d'adornu bien afitáu ente les piedres que lu identifica ensín duldies. El tiempu que mos llevó llegar equí fue de 2 hores y cuartu.

Picu La Múa

Con unes semeyes a les perguapes vistes que tenemos dámonos por contentos y entamamos el camín de vuelta. Baxamos hasta el Colláu La Verde, y ye equí onde mos vamos desvíar del camín de ida. Nesti puntu coyemos direción NO y topamos con una lladera con gran desnivel agüeyando abaxo les cabañes de Brañabérnez, pero nós nun vamos descender per equí, sinon que vamos facelo en diagonal, esta parte ye la más costosa porque ye un cotollal y hai que dir con curiau de nun retorcer un tobiellu y de nun pinchase dafechu. Dempués d'un cachín de dir ensín senda marcada dimos con una caleyina estrecha que mos averó al pueblin de Casielles nel que pudimos parar pa xintar al llau d'una cabañuca. El recorríu que mos queda namás ye siguir la pista que baxa con fuerte descensu y que mos empobina al puntu de partida.
Llegamos a la fin al coche dempués de 4 hores y media. Conclusión: ruta corta anque con fuerte desnivel por momentos, vistes guapes y contentos pa casa hasta la próxima.

Valle'l Llagu - Llagu'l Valle

2008-02-24T22:46:00.000+01:00

El cambiu climáticu ye un problema grave dafechu, lo que fai pocu tiempu yera dalgo cercano agora ye una rialidá. Nun ye nin muncho menos normal que a estes altures del iviernu tés nel interior d'Asturies a más de 1000 m d'altura y nun haya un res de ñeve. Ya naguábemos por facer esta excursión, y cuntábemos cola esperanza d'atopar dalgo de ñeve, pero había mui poca. Llegar hasta'l pueblu d'El Val.le en Somiedu ye un viaxe llargu. Casi dos hores tárdase dende Xixón.

- Partimos del pueblu d’El Val.le nel Conceyu de Somiedu, dexando los coches nun parking bien afayaizu qu’hai ente’l propiu pueblu y un barriu del mesmu nomáu L’Outeiru.

- Caleyamos hasta’l barríu de L’Outeiru, y al final d’esti entama la pista que mos llevará directamente hasta’l propiu L.lagu del Val.le.

- Tol camín vamos dir dexando a la nuestra mandrecha’l ríu Val.le, que da nome al propiu valle, al pueblu y al llagu que queremos ver nesta ruta, y caleyaremos entre dos muries de montañes que faen el valle del Ríu Val.le. Siempre mucho más alta y con picos bien guapos a la nuestra mandrecha.

- Podemos destacar ente estos picos: Picu’l Rebezu (1902 m), El Faspaxún (1927 m), El Corralón (1860 m), Picu’l Canalón (1896 m) que tien nes sos faldes una cueva nomada Cueva Meliz (1781 m), Picu L’Arcu (1696 m) y Picu la Fana (1841 m).

- Hai que dicir que partimos d’una altura de 1275 m nel barriu de L’Outeiru y nuestru final será a 1578 m nel propiu llagu, y qu’a lo llargu del camín veremos un sin fin de praderíes y brañes enllenes de teitos.

- El primer finxu qu’alcontramos nel camín será la Fonte El Cotán nuna curva que fae’l camín y pocu dempués d’ella, tenemos la primera bifurcación bien señalizada a tomar, la nuesa intención ye tomar el camín de la mandrecha que nos lleva al L.lagu del Val.le. L’otru camín nos llevaría a otra ruta bien guapa que sería la de los llagos de Saliencia.

- Poco dempués d’esta bifuración llegaremos a la braña de Cobra, na qu’atopamos otra bifurcación, pero esta vegada empobinámonos pela manzorga y xubimos per una pista d’hormigón, que mos llevará a través de la Pradera’l Val.le hacia’l nuestru destín.

- Poco enantes de llegar al propiu L.lagu del Val.le tendremos les mayores dificultaes en cuanto a la pendiente del camín. Esta zona ye conocía como El Texu, y ya sabremos que tamos cerca del propiu L.lagu ya que veremos al fondu, el circu glaciar nel que descansa, formáu por Los picos Albos (Albo Occidental(2070 m), Picu Rubio (2047 m) y Albo Oriental (2104 m)), una zona de montes más baxos nomada Duernas y La Bárcena, Peña La Mortera (2021 m) que da nome a la Sierra de la Mortera a la que pertenez Peña’l Miru (1901 m).

- Otros picos que se ven per detrás d’esti circu y que ya son la llende con Castiella son la Peña Chana (2067 m) más a la mandrecha, Torre Orniz (2191 m) y Peña Orniz (2176 m) xusto detrás del propiu circu glaciar.

- Ya una vez qu’algamamos la fin del camín, ye dicir el L.lagu del Val.le, ye bien guapu arrodialo, con una paradina na zona d’El Pedregal, de la que parte una guapa escalada a los Picos Albos, y siguir arrodiándolu hasta xuntanos al camín pol que vinimos a traviés d’una ponte, dalgo más abaxu de la muria que retién el llagu construída por Hidroléctrica.

- Ye una ruta bien facilina, y sí se ta preparáu lo guapu ye facer dalguna ascensión a cualquiera de los picos d’alrededor, siempre y cuando nun se tea na dómina d’iviernu na que la ñeve incrementa la dificultá de l’ascensión y la gueta'l camín afayaizu p’ascender.

- Si solo se quier ver el l.lagu ye bien recomendable dir en xineru, febreru ya que ye perfácil alcontralu xeláu como mos pasó a nós.

Altu la Llama - Picu Miruenu

2008-01-28T22:18:00.000+01:00

Pa finar de recorrer el Sueve, esta vegada propúsimonos entamar pel otru llau del cordal, ye dicir, pela parte ocidental, bastante más guapa a mio paecer. Esta caminata entama nel altu la Llama, que ye la llende ente los conceyos de Piloña y Colunga, asina que dexamos el coche equí, en frente del bar "Asturcón".

Entamu

- Garramos una pista que mos va llevar durante la metá del camín ensín nengún equívocu, eso sí, siempre nun porcentaxe de pendiente elleváu enforma.

- Nel entamu d’esta pista vamos dexando a la mandrecha los altos de la Teyera (506 m) y el Cuetón (573 m), pa dempués torcer a la manzorga y dir per una cuesta que llámase Llanuxintar, que mos empobinará hasta’l primer mayáu de descansu, que se pue facer. Esti prestosu mayáu ye la fin d'una pequeña cordalera, llamada El Pedregal (669 m), la cabera estribación (634 m) ye completamente de roca descubierta y ya pegada a la pista, dexándonos na so falda’l nomáu mayáu pa descansar.

- A partir d’equí entamen una serie de ciszases cuesta arriba de la pista que mos van llevar a un mayáu dalgo más grande que l’anterior, esti conozse como Sames. Y de Sames p'alantre veremos que la pista mos lleva ya paralelos a la parede que supón el Sueve, y dexándo sigún xubimos a la manzorga, l’Altu Palomeros (994 m).

- Dexaremos d’ascender al fin, al llegar, a la Collá Oviñes que-y da nome a esa zona de piedra blanca llamada’l Caspión d’Oviñes onde podemos agüeyar una guapa cabaña con un depósitu d’agua (872 m) cerquina d’ella. La pista serpenteará con esti depósitu a la mandrecha y la nomada collá d’Oviñes que caltién la cruz de María Mingo a la manzorga.

- Caleyaremos dalgo más, pela pista, hasta llegar a la Mayá d’Espineres, onde hai delles cabañes bien remocicaes y sedrá’l final de la pista. Nesti mayáu fáese la Fiesta l’Asturcón que ye bien nomada nesta fastera d’Asturies.

Mayá d'Espineres

- A partir d’eiquí entama la verdadera aventura de dir de monte. Acabose la pista y agora decidimos tomar una ruta pa la ida y otra pa la torna, o más bien, ye la ruta la que mos lleva a nos. El casu ye que avanzamos al traviés d’unes rodáes de trator que mos lleven a pasar por dellos praos con asturcones y gamos paciendo y árboles dexando a la manzorga el picu Maladín (913 m) y el Cuetu Melón (916 m) a la mandrecha, siempre avanzando per estos praos nomaos El Foyu.

- Siguimos caleyando hasta qu’arribamos a una zona de non torna, ye dicir, fináronse los praos y los árboles y agora toca buscar el camín nes faldes del Picu la Múa (1020 m), conocíes como la Salgar. Equí nun hai un camín más válidu qu’otru, namás mos queda crestear per estes faldes hasta arriodar la Múa siempre pola drecha la so cima.

- Ye una zona, pa tomalo con traquilidá, y mirar onde se pisa, ya que hai un desnivel perimportante a la mandrecha, dexándonos una vista impresionante de los valles de Parres y Piloña y de los praos pertenecientes a los pueblos de Fíos, Villar de la Cuesta y Cofiñu. Al fondu tenemos la vista de los picos d’Europa, siempre presentes. Ye una pena qu'en plenu iviernu apaezan los Picos casi ensín ñeve, nun sé qué será d'Asturies n'unos años con esto del cambiu climáticu.

- El primer sitiu que mos diz que vamos bien, depués d’esti crestéu ye asitiános n’unes cabañes d’un sitiu nomáu el Requexu. Dende equí, ya vemos el nuestru fin, el Miruenu, y detrás d’él, el picu Pienzu cola so cruz. Dende estes cabañes nun mos queda más que siguir caleyando hacia’l picu Miruenu que s’acolumbra p’enriba nos. El camín a siguir, el más fácil qu’alcontreis, porque nun hai un senderu mui nidiu, y ye bien fácil perdese. Pero siempre tenemos que saber que vamos dexando a la mandrecha les Peñes Verdes (1044 m) que son unes formes rocoses que siguín la línea de caída hacia los valles del picu La Múa.

- A la fín llegamos a una cabañuca, y siguimos caleyando ya que s’agüeya otra cabaña más grande y afayaíza dalgo más arriba. Ésta segunda cabaña forma parte del mayáu conocíu como’l Potril (978 m). Na cabaña na que tamos tien una puerta tallada bien guapa, y un árbol onde poder sentase a descansar. Rodiando una pequeña roca, llegamos a la otra parte del Potril, una zona mui prestosa na que esiste una gran cabaña de dos pisos, y estanque perguapu.

El Potril

- Nesti momentu tamos na falda del picu Miruenu, asína que l’ascensión final ta’l cayer. Equí como suele ser vezu lo meyor ye tirar p’arriba al nuestru xeitu, y nun intentar guetar caleya dalguna. Como conseyu lo meyor ye bordiar pela mandrecha les primeres paredes del Miruenu y ascendelu dende la so metá, pa llegar a traviés de zones bien facilines a la so cima (1137 m). Ellí na cima del Miruenu, tenemos unes vistes acoyonantes cualesquiera seya la direción na que miremos, ya sea pa la costa (Norte), pal Picu Pienzu (Este), bien cerquina de nos, (30 minutos, de camín, cresteando a lo sumo), pa la nuestra ruta (Oeste) na que vense dellos picos del Sueve como (orden de cerca a lloñe): Picu les Mantegues (1027 m), Picu Fontaniella (1064 m), Espina Barbú (1040) y por últimu Altu Palomeros (994 m). Hacia’l Sur tenemos la vista de los valles de Parres y Piloña enantes comentaos.

No alto del Picu Miruenu

- Agora namás ya mos queda baxar del Picu Miruenu hasta’l mayáu del Potril onde tomaremos otra ruta menos dura, pa tornar a la Mayá d’Espineres. Tomaremos camín dende’l Potril, siempre empobinándonos hacia la mandrecha, zones de pación y arrodiaos de peñes calices. Nesta zona ye bien fácil alcontrar delles manaes de gamos, lo cual ye dignu d’observar. Siguiremos caleyando per esta ruta abondo más lliviana que la de ida, dexando a la mandrecha la Espina Barbú, hasta que llegamos a una zona de cabañes, nomada tamién Espineres, y equí veremos dalgo más abaxo’l llagu artificial del Requexu. Dende equí tenemos una guapa vista de la Espina Barbú y del Miruenu al fondo. Agora ya tamos nesti llagu na falda del Palomeros por tanto’l mayáu d’Espineres ta bien cerquina.

- Llegaremos a ésti per praeríes y dexando el Picu Maladín a la manzorga y custodiaos pola parede del Palomeros a la mandrecha. Una vegada, que tamos na Mayá d’Espineres, ye bono recargar d’agua na fonte ellí presente y ya garrar la pista hasta tornar pasín a pasu a traviés de la pista hasta l’Altu la Llama, onde se pue tomar dalgo y descansar nel bar.

Por últimu dicir, qu’esta ruta amuesa dafechu, lo que ye dir de monte, una pista bien marcada hasta los mayáos y praderíes de montaña, y a partir d’ehí buscar la meyor vía posible p’algamar la falda del picu a esguilar

El Fitu - Picu Pienzu

2008-01-20T19:03:00.000+01:00

Ésta ye una ruta perconocía onde pué visitase una de les cordaleres con más hestoria ya identidá d'Asturies, onde l'asturcón cuerre pelos sos praos y onde la mar y la montaña son una mesma cosa: El Sueve.
El camín que siguimos ye como vos cuento darréu:

-Partimos del Mirador del Fitu (598 m).

-Cruciamos la carretera y rodíamos l'antiguu refuxu (623 m) pela manzorga yendo a parar a una zona conocida comos Les Llanes (610 m) enllena d'arboles y pación.

-Nel siguiente tramu vamos arrodiar varies peñes, too ello a traviés d'una senda bien marcada: La primera peña qu'alcontramos ye la Peña Pueres (628 m) que mos queda a la mandrecha. Pocu dempués vamos pasar a arrodiar otra peña, pero esta vegada pasamos a facelo pela mandrecha, dempués de camudar el sentíu nun llanu. Esta peña ye conocía como El Palomberu (671 m). Por últimu siguimos caleyando hasta arribar a la falda del Cantu la Teya (727 m) la cuál reconozse perbien gracies a que na so base alcontramos un depósitu d'agua.

- Dempués d'esti tramu, ya pasamos a una zona más llana conocida como Los Arrudos pa baxar dexando a la manzorga otra peña llamada Poliares (682 m) y volver a xubir otru ratín hasta un mayáu bien guapu nomáu Les cabañes d'El Bustacu (682 m) donde se pue descansar nes sos praderíes.

El Bustacu

- Ya dende esti puntu, garramos un caleyu con una pendiente contínua, que nos lleva hasta la mesma falda del Picu Pienzu. Toa esta xubida ye paralela a la Riega la Viescona,que facémosla al traviés del valle que fae El Bocón de les Duernes (a la mandrecha) que ye la pared que representa la falda del Cuetu les Duernes (1063 m) el cuál distínguese dafechu gracies al repetidor qu'alberga, y la pared de la manzorga formada pola Peña Corvera (962 m) y los Cuetos de Salamea (941 m) que tan casi xuntos.

Cabañes de Mergullines

- La fin d'esti camín ye les cabañes de Mermullines o Mergullines onde se pue descansar para xubir un pelín más y arribar a El Beluenzu (926 m) que ye un mayáu bien guapu con bona pación y nieve nel iviernu. Esti mayáu pudiera ser la falda del Pienzu, pero inda depués d'una pequeña ascensión, llegamos al descansu final enantes de la ascensión tala. Ye El Cuadru (993 m) otru pequeñu mayáu en comparanza col Beluenzu, que ya mos indica que la ascensión final ta al cayer.

El Beluenzu

- Agora nun mos queda más qu'ascender práuticamente d'una forma aleatoria, hai dalgún pequeñu senderu, pero demientres t'ascendiendose piérdese con dellos senderos más, polo que lo cimero ye llegar al picu por tanto nun mos queda más que xubir como bien se pueda.

- A la fin llégase al Picu Pienzu (1168 m) el cual ta coronáu por una gran cruz de 16 m.

Los Arrudos

2007-12-10T22:32:00.000+01:00

Ya taba yo pruyendo por facer esta ruta y de pasu conocer esta fastera, que tá nel conceyu de Casu, dientro de lo que agora ye'l parque de redes, y qué raro pa los vergoñosos impresentables que gobiernen Asturies que nun puén respetar lo nuestro y agora quieren facer otru embalse en mediu d'una zona d'altu valor ecolóxicu y amás, protexía.
Ye una caminata que nun tién pérdida, y si hai suerte puén vese rebecos. Al pocu d'entamar pudimos ver una pareya d'ellos al otru llau del ríu.
Lo meyor ye dexar el coche nel pueblu de Caliao, y ehí entamar la ruta. El primer cachu va per una pista que nun tien dificultá dalguna, llueu pásase a una caleyuca, y más alantre, en cuantes que entama la xuba ye lo que vien nomándose desfiladeru los Arrudos. El ríu siempre lu vamos dexando a la izquierda. El caminante atopará unos peldaños fechos con piedres, y agora la subida sedrá dura durante un cachu.
Llueu llegaremos a La Fontona, que ye el final a lo que llamen el desfiladeru de los Arrudos, pero nós tenemos fuercies y decidimos siguir p'alantre. Llueu llegamos a unes praeres con unes cabañes en ruines, y alcontramos un cartelu que mos indica que si tiramos too p'alantre llegamos al llagu Ubales, entós propusímonos facelo, y siguiendo lo que tien que ser un arroyu en primavera(agora secu), tiramos too per ente les piedres unos 45 minutos, y llegamos a atopar otres cabañes, pero ya yera dalgo tarde pa siguir, ya yeren les 2 de la tardi y teníemos que parar a xintar, y cuntando qu'estos díes oscurez bien pronto, daremos la ruta por terminada nesti preciosu paraxe. Eso sí, casi quedamos xelaos xintando, -aunque el mio collaciu Berto que diba con nós nun llevó abrigu y ehí taba de gallu en camiseta-, asina qu'al pocu ya tornamos pa Caliao de nueu y a les 4.30 llegamos al puntu de partía.

Déxovos un enllaz interesante onde fala de la ruta completa:
http://www.infoasturias.com/action/InfoasturiasFichaRecurso?recursoId=3943&metodo=getFichaHTML

Cordal de Peña Mayor

2007-11-19T23:31:00.000+01:00

Tábemos de camín pa'l conceyu de Bimenes, onde se llevanta Peña Mayor (1123 m), y taba cayendo una xelá de mieu. Díbemos nel coche a cero graos per Nava. Pero en llegando a Melendreros, que yera'l puntu de partía pa la caminata facía sol y equí enriba taba munchu menos frío que embaxo. Esti pueblu tá a 620 m, asina que'l desnivel que díbemos afrontar yeren 500 m.
Entamamos la excursión en sentíu E haza Fayacaba per una pista na que nun hai pérdida. Depués d'andar non más de media hora llegamos a un sitiu onde la pista sigue pero nós tenemos que desvíanos per un camín en sentíu N haza Les Praeres, que ye'l colláu que vemos en seguidina. Equí, garramos de nueu la pista y seguímosla un cachu grande rodiando Peña Mayor, y pela cara Norte del cordal onde podemos acolumbrar unes vistes perguapes de la costa hasta alcontrar una bifurcación onde coyemos la pista que tira pa la drecha y que llega al mayáu d'Ortigosa. Llueu d'equí siguimos y llegamos al mayáu d'Espines onde atopamos una cabañuca con un cartelu que pon "Espines" y coyemos el caminín que sube pela drecha, y ye nesti momentu cuandu mos decidimos a xubir de verdá. Hasta agora nun foi mas que un paseín con mui bones vistes y amás con un día soleyeru asgaya.

Cá ún pué xubir per onde-y pete, nun tien mayor dificultá. Peña Mayor ye lo que queda más a la mandrecha, ye l'extremu drechu de la cordalera mirando pa ella dende onde tamos nesti momentu. Una vegada enriba tuvimos una vista preciosa del Sueve (ensín ñublina, que ya ye suerte), Picos d'Europa, l'Aramu, y hasta pudimos ver la campa torres de Xixón y Aboño echando fumu.
Depués d'esto echamos un par de güevos y fuimos cresteando per tol cordal hasta llegar onde la guitarrina del Presi, que ye'l picu'l Texíu. Más allá, onde unes antenes tá el picu La Triguera, pero hasta ehí ya nun fuimos, tábemos ya abondo cansaos.
Nesti momentu entamamos el descensu a lo burro pela lladera sur y llegamos a unes camperes onde pacíen caballos. Per equí cerquina, nun sé del tou onde, tá el famosu pozu Funeres.
Agora ya garramos el camín que mos lleva de torna pa Melendreros.
Foi una caminata facilina y guapa y que se pué facer n'una mañana, pero nós ficímosla tranquilinos y a les 5 la tardi llegamos al coche.

Paseu per Taramundi (Os Esquíos - As Veigas - Os Teixois)

2007-11-12T23:29:00.000+01:00

Esti fin de selmana paselu en Taramundi, tuvimos la moza y yo aloxaos nun pueblu nomau Bres. Esta zona ye mui desconocía pa mín, bono, en realidá ye mui desconocía tola zona occidental d'Asturies. Ya taba naguando por facer un recorríu per toa esta zona. El vienres llegamos a Bres y fuimos dar un paseín pela villa de Taramundi y asina de pasu coyimos unos panfletos de caminates pel conceyu.
Y ya el sábadu aprovechamos pa facer una rutina pequeñuca. Yera tan curtia que realmente fue un paseín. Dexamos el coche nel pueblu de Os Esquíos y fuimos caleyando pente una viesca de castaños. El díi taba mui soleyeru, la verdá que taba precioso pa caleyar. Llueu atopamos el pueblu de As Veigas. Al paecer esti pueblu desapaeciera fai dellos años, pero agora volvieron a recostruyilu, y lo que hai ye básicamente cases rurales y un restaurante. Nun sé nin siquiera si vive xente tol añu equí. Pero hai que dicir que ye perguapu, ye como de cuentu, de repente atópeslu y tá empozau nun valle. Depués sigues caleyando pel monte, ya per una zona mas descubierta d'árboles y acabes llegando al pueblu de Os Teixois, famosu en tola comarca pol conxuntu etnográficu que posee (molín, mazu y batán), too ello furrulando gracies a la enerxía del agua. Pué visitase por un módicu preciu, y merez muncho la pena, pero hai que venir abrigau porque nesti pueblu nun da'l sol en tol hibiernu, y facía un cutu qu'escarabayaba el pelleyu.
A la fin, en saliendo de Os Teixois y caleyando non más de media hora llegamos al puntu de partida, en Os Esquíos.
En total fueron 7 km mui prestosos de caminatuca y pudimos pañar unes castañes de pasu.
Amás pola tarde averámonos a un mayestru navayeru de los varios qu'hai pela zona y fízome una navaya bien guapa coles mios iniciales grabaes na fueya.

Picu Monsacro

2007-11-04T23:10:00.000+01:00

Ayeri, sábadu 3 de payares fuimos al picu Monsacro, en Morcín. Ye un sitiu perguapu y que nun conocíamos nengún de nós. La forma de llegar ye mui facilina, hai que llegar hasta Santolaya de Morcín y d'ehí dir hasta la Collá(La Collada). Pocu enantes de llegar al pueblín de la Collá hai un camín con un cartelu que marca l'entamu de la ruta y que ya reflexa una xuba percuesta pa'l monte.
Depués de tar siguiendo el cuestu camín y faciendo eses monte p'enriba llégase a un colláu onde puén vese oveyes y caballos paciendo y dende onde acolumbramos ya mui cerquina la cima de La Fayona(1020 m) y el picu Monsacro(1057 m). Pero lo realmente interesante d'esti viaxe son les dos ermites qu'alcontramos equí enriba. Son la ermita de la Madalena y la de Santiago. La más interesante al mio paecer ye esta cabera, que ye de planta octogonal y pertenez al románico pero nun se sabe con seguridá el sieglu.
Namás llegar a esti colláu quedamos ablucaos cola belleza del paisaxe, eso sí, tuvimos qu'esperar un ratín qu'escampara la borrina, que nun mos dexaba ver un rés. En cuantes vimos apaecer estes ermites pente la ñublina foi como una aparición.
La verdá ye que esti ye un llugar que tién daqué especial, dalgo como máxico o místico. Prueba d'ello son los estudios que dicen qu'equí facíense cultos precristianos. Ésto revélenlo los túmulos funerarios descubiertos y el dolmen sobre'l que s'instaló la ermita octogonal.
Toes estes revelaciones dan respaldu al nome de Monsacro (monte sacro), too paez tar xunío y fae qu'esto seya algo más qu'un simple monte.
Al final, los mios collacios y yo sólo llegamos a xubir a La Fayona, y ye que nun tábemos mui seguros de cuál yera el Monsacro, suponíemos que yera'l inmediatamente contiguu, pero la borrina taba echándose enriba de nós peligrosamente y preferíemos dir tirando p'abaxo enantes que pasalo mal.
Al final la ruta fáese bien en cuatro horuques cuntando la ida y la torna.
De verdá qu'encamiento al tol mundu que descubra esti llugar, que merez la pena por muches razones, tanto paisaxístiques como hestóriques y culturales.

ruta Xixón - Cuadonga

2007-10-10T23:08:00.000+02:00

Esta ruta son 75 kilómetros. La marcha entama en Xixón, más concretamente en Deva y llégase al santuariu de Cuadonga.
Ye la famosa ruta de la tertulia cultural "el garrapiellu". Pa ello, hai que siguir les marques que ellos punxeron. Éses marques son trisqueles (o garrapiellos) y n'algunos casos hai hasta cartelos de madera.
Ye una marcha mui guapa que pasa pelos conceyos de Xixón, Villaviciosa, Piloña, Parres y Cangues d'Onís.
Los díis de marcha varíen de ún a tres. La xente que va por primera vegada y nun tá mui d'andar aconseyo-y que la faiga en tres díis. Lo más normal ye facela en dos díis, y los más avezaos fáenla n'un díi.

Yo ya voi 4 años que la faigo. La primera vegada andúvela en tres díis. Hai que dicir que yera un 21 d'avientu y los díis son mui curtios, amás como dixe enantes ye perimportante nun pecar de atrevíu la primera vegada. Ésa primera vegada dormimos la primera noche en Sietes, y el segundu díi dormimos en Villanueva de Cangues.

Y ya los caberos tres años fícela en dos díis, y la planificación foi exactamente igual les tres vegaes.

Primer díi
Deva - Amandi - Borines (ente 35 y 40 km)

Segundu díi
Borines - Cangues d'Onís - Cuadonga (unos 35 km)

Esta ruta ye una mui cansada, pero que hai que disfrutala, sobremanera pol fechu de que pases por una cantidá grande de pueblinos y lo guapo que ye el paisaxe, sin perder de vista nunca el cordal del Sueve.