viernes, 9 de octubre de 2009

Tuiza Riba - Picos del Fontán (2414m)

Archivos GPS:
Track: descargar (plt) / descargar (gpx)

Waypoints: descargar (wpt)
Mapes: descargar (zip)

Llugar
: L.lena
Duración: 6 hores (3,5h subida / 2,5h baxada)
Puntu de salida: Tuiza Riba

Desnivel: 1200m
Dificultá: Media - Alta


Percorríu




A Tuiza dende Asturies llégase al traviés de Campumanes. Hai que garrar la carretera LN-8 hasta topar con Tuiza Riba depués de pasar Tuiza Baxu. Hai bon aparcamientu pa dexar el coche.


Namás salir ya mos empobinamos con una pendiente constante y per un camín de ganao Vega de Meicín que sedrá la primer parada. Nesti camín acolumbramos al fondu Peña Ubiña. Dende'l refuxu (1545m), si miramos en dirección SO vese un colláu que ye onde se tendría que llegar si subiéremos a Peña Ubiña. Pero nesti casu en dexando a manzorga el refuxu de Vega de Meicín (mui feu por ciertu) diremos dirección NO pa llegar a un altu que ye la Forqueta del Portillín (2049m). Hai que dicir qu'esti percorríu ye pindiu abondo y cá ún tien de facelu al so ritmu, ya que nun toos tenemos el mesmu fondu físicu.


En llegando a la Forqueta del Portillín facemos un merecíu descansu mientres se mos respiga'l pelleyu, y nun solo por fríu sinon poles grandioses vistes. Amás, ya podemos ver los picos de los Fontanes, el nuestru oxetivu.


A partir d'esti momentu llega la parte más difícil, más rocosa y cola que hai que tener más miramientu porque nun ye apto pa tolos públicos.


Cruciamos la Forqueta y vamos caminando con cuidau peles lladeres de los picos del Portillín y del Crestón del Pasu Malu ensín ascender pero ensín perder altura. Barruntamos que too esto pudiere haber sido un antiguu glaciar. Sólo son conxetures.


En llegando a la base del Canalón del Buey (ó Canalón del Güe n'asturianu) entainamos la subida pela canal bien pegaos a la parede izquierda pa dir garrándonos a la roca nes zones más complicaes. Ye MUI IMPORTANTE que la xente faiga la subida al so ritmu y mirando pa la xente que tien debaxo porque ye mui fácil qu'argayen piedres col consiguiente peligru pa los que tán en baxu.


En cuantes que lleguemos arriba del Canalón del Buey vamos tar frayaos de tanto subir y de la concentración de facer les coses bien pa nun ponenos en peligru a nós nin a los que vienen per detrás. Pero acolumbramos unes vistes perguapes de Lleón y de los montes d'Asturies. Tamos na llende.


Agora quédamos el caberu repechín que vamos superar ensín muncha dificultá pa topar primero el Fontán Sur y darréu, unos metros más p'alante finaremos el percorríu d'ida nel Fontán Norte.


P'acabar namás dicir que fuimos con unos collacios vascos que diben como motos y que mos costó asgaya siguilos. Mándo-yos dende equí un abrazu.


Subidendo a la Forqueta'l Portillín


Peña Ubiña al fondu


Vista del refuxu dende la Forqueta'l Portillín

Vista de los Fontanes dende la Forqueta'l Portillín


Canalón del Buey

Fontán Sur

3 comentarios:

  1. Afayámonos nesti nuevu blog montañeru. A siguir p'alantre. Esti finde tornamos al ataque. Verás que soba coche p'arribar al puertu vegará.

    Por ciertu, eses 6 hores de duración son abondo positives ya que nun paramos nin pa mexar dafechu. Ya averaríalu meyor a les 7 hores, pa que la peña nun se lleve sorpreses, jeje.

    En fin, bona idega lo del nueu blog pa nun enguedeyar conteníos.

    Salú collaciu

    ResponderEliminar
  2. Sí, 6 hores igual son un pocu optimistes. Guieme polo que tardamos nós.
    Esti finde tornamos que ya hai ganes.
    Un saludu.

    ResponderEliminar
  3. Parezme que la dificultá tenies que cambiala a alta, aunque sólo fuera pol desnivel. Una ruta con 1.200 de desnivel, tramos perpindios, con el tramu de pedreru... que positivu yes señor.

    En fin, ya era hora que recuperases. Esti añu va a ser completu.
    Esperemos que esa rodilla aguante.

    ResponderEliminar