Track: descargar (plt)
Mapes: descargar (zip)
Llugar: Cangues d'Onis / Ribesella
Duración: 3 hores (1h 40' ida / 1h 20' vuelta)
Puntu de salida: Collada d'Ixena
Recorríu
Pa llegar a Ixena dende Xixón hai que llegar a Nueva(conceyu de Llanes) y ehí desvíase pela carretera AS-340 en direición a Rinsena (hai un cartelu que lo indica). Pocu depués de pasar Rinsena dexamos el coche nuna cuneta xusto onde sal un camín formigonáu en direición al monte. Hai un cartelu nun árbol que señala l'entamu de la ruta al Mofrechu.
Namás salir hai que dir a la mandrecha y pasar una portiella. Depués, más alantre vamos atopar una segunda portiella. Al pocu, el camín sedrá caleya de monte, anque ye bien amañosu pa dir cómodu andando y con poca pendiente que nun se fai dura n'escesu. Tan sólu hai que llimitase a siguir el camín, que nun tien perda denguna. Les vistes de Picos d'Europa que vamos viendo na subida son perguapes con un contraste intensu del verdor de los praos y la ñeve.
En llegando a la mayá de Güeses el terrén danos un descansu, dexa de ser cuestu por un peazu. Pocu depués llegamos a otra zona de cabañes que se llama Vega La Fuente. Siguimos con el camín en pendiente pa llegar pocu depués a Vega Maor con una placa conmemorativa a un guarda fallecíu. Ya acolumbramos la peñona del Mofrechu que la tenemos delantre los güeyos. Sólo mos queda enfilar un peacín más el camín, nel que atopamos una manada de vaques y xatos tapando el pasu. La subida al picu facémosla pel sitiu que más afayadizu vemos pa subir, pero éso ya ye a gustu de cada ún. Arriba del tou atopamos otru grupín de vaques. Ye la primer vez que veo vaques enriba d'un picu, paeciome raro qu'estos animales llegaren tan arriba.
Una vez na cima les vistes son precioses, con Ribesella a los pies, el Pienzu al oeste y los Picos al sur.
Subiendo hacia la mayá de Güeses
Vista de Ribesella
El que vos fala, colos Picos al fondu
Vista de los Picos
Los cuatro montañeros
Entradas
cuidau con la tu rodilla güaje, que luegu no traesmes mas que disgustos!
ResponderEliminarHomee, alégrome enforma de que pueas tornar a la montaña gallu. Vete polo segáu, qu'esa rodiella ta mui verde inda.
ResponderEliminarPor ciertu, lo de Ih.ena ye una patada increyible tio. Infórmate: http://politicallinguistica.org/toponimia.php que pa dalgo tan fechos estos trabayos toponímicos y oficializaos. Nun llevemos nós mesmos a más equívocos
Berto, gracies pola información. Soi cosciente de que'l topónimu más usau ye Ixena, y como bien dices el que marca la oficina de toponimia. Pero si mires esti enllaz
ResponderEliminarhttp://www.orienteastur.info/?IdContenido=94&IdSubcategoria=3&IdCategoria=2&IdElemento=1
verás que usa el topónimu Ih.ena. Recordemos que orienteastur ye una fundación financiada pol Principáu y na que participen amás representantes d'estes comarques, que dalgo debieren saber de los topónimos.
Dicho esto, sí ties razón en que ye meyor usar Ixena por ser más "oficial"
Ya sabes tio. Nun ye por ser repunante, sinon que soi mui críticu con estes coses. Y como non, siendo oficial nun ver los cartelos como tien de ser jódeme. Así que la propia normativización y oficialización entama por nós mesmos.
ResponderEliminarPolo demás, esti sábadu Ordiales - Cotalba.
Esti sábadu a Ordiales. Yo polo menos intentaré llegar al refuxu de Vegarredonda, y ya veré si puedo llegar al Mirador. Vosotros a vuestra bola.
ResponderEliminarHola. Nun ye solamente porque "Ixena" sea oficial y heba que cumplir relixosamente con esi nome. Ye porque "Ixena" ye como se diz na h.abla d'aquella parte.
ResponderEliminarEsi otru "Ih.ena" nun ye más que'l nome castellanizáu "Igena" con otra ortografía. Nun voi dicir que nun se sienta, porque desgraciadamente los nomes castellanizaos pueden oyise ondequiera, pero'l que lu punxo na web d'orienteastur sabe bien poco de la toponimia autóctona de Cangues.
Saludos y a cuidase.
Gracies Pedrín pol to apunte. A petición popular voi esborriar onde pon "Ih.ena"
ResponderEliminarAlégrome de que la petición popular furrulase.
ResponderEliminarA too esto gallu, veote nes semeyes ensín rodiellera. Nun ye por nada, pero nun te venía nada mal, que mercases una, nel monte, un mal xiru y ties la rodiella mirando pa la cuenca.
Faeme casu, merca una bona, que nunca ye un gastu de más
El pueblu de Llanes dende'l que se cueye la carretera a Rinsena ye Nueva, non Naves. Y yo, que soi de perhí, siempre oyí Ixena. Mi bien el blogue.
ResponderEliminarTies razón, colóseme ehí.
ResponderEliminarYa ta correxío.