Los Arrudos

Ya taba yo pruyendo por facer esta ruta y de pasu conocer esta fastera, que tá nel conceyu de Casu, dientro de lo que agora ye'l parque de redes, y qué raro pa los vergoñosos impresentables que gobiernen Asturies que nun puén respetar lo nuestro y agora quieren facer otru embalse en mediu d'una zona d'altu valor ecolóxicu y amás, protexía.
Ye una caminata que nun tién pérdida, y si hai suerte puén vese rebecos. Al pocu d'entamar pudimos ver una pareya d'ellos al otru llau del ríu.
Lo meyor ye dexar el coche nel pueblu de Caliao, y ehí entamar la ruta. El primer cachu va per una pista que nun tien dificultá dalguna, llueu pásase a una caleyuca, y más alantre, en cuantes que entama la xuba ye lo que vien nomándose desfiladeru los Arrudos. El ríu siempre lu vamos dexando a la izquierda. El caminante atopará unos peldaños fechos con piedres, y agora la subida sedrá dura durante un cachu.
Llueu llegaremos a La Fontona, que ye el final a lo que llamen el desfiladeru de los Arrudos, pero nós tenemos fuercies y decidimos siguir p'alantre. Llueu llegamos a unes praeres con unes cabañes en ruines, y alcontramos un cartelu que mos indica que si tiramos too p'alantre llegamos al llagu Ubales, entós propusímonos facelo, y siguiendo lo que tien que ser un arroyu en primavera(agora secu), tiramos too per ente les piedres unos 45 minutos, y llegamos a atopar otres cabañes, pero ya yera dalgo tarde pa siguir, ya yeren les 2 de la tardi y teníemos que parar a xintar, y cuntando qu'estos díes oscurez bien pronto, daremos la ruta por terminada nesti preciosu paraxe. Eso sí, casi quedamos xelaos xintando, -aunque el mio collaciu Berto que diba con nós nun llevó abrigu y ehí taba de gallu en camiseta-, asina qu'al pocu ya tornamos pa Caliao de nueu y a les 4.30 llegamos al puntu de partía.

Déxovos un enllaz interesante onde fala de la ruta completa:
http://www.infoasturias.com/action/InfoasturiasFichaRecurso?recursoId=3943&metodo=getFichaHTML

Cordal de Peña Mayor

Tábemos de camín pa'l conceyu de Bimenes, onde se llevanta Peña Mayor (1123 m), y taba cayendo una xelá de mieu. Díbemos nel coche a cero graos per Nava. Pero en llegando a Melendreros, que yera'l puntu de partía pa la caminata facía sol y equí enriba taba munchu menos frío que embaxo. Esti pueblu tá a 620 m, asina que'l desnivel que díbemos afrontar yeren 500 m.
Entamamos la excursión en sentíu E haza Fayacaba per una pista na que nun hai pérdida. Depués d'andar non más de media hora llegamos a un sitiu onde la pista sigue pero nós tenemos que desvíanos per un camín en sentíu N haza Les Praeres, que ye'l colláu que vemos en seguidina. Equí, garramos de nueu la pista y seguímosla un cachu grande rodiando Peña Mayor, y pela cara Norte del cordal onde podemos acolumbrar unes vistes perguapes de la costa hasta alcontrar una bifurcación onde coyemos la pista que tira pa la drecha y que llega al mayáu d'Ortigosa. Llueu d'equí siguimos y llegamos al mayáu d'Espines onde atopamos una cabañuca con un cartelu que pon "Espines" y coyemos el caminín que sube pela drecha, y ye nesti momentu cuandu mos decidimos a xubir de verdá. Hasta agora nun foi mas que un paseín con mui bones vistes y amás con un día soleyeru asgaya.

Cá ún pué xubir per onde-y pete, nun tien mayor dificultá. Peña Mayor ye lo que queda más a la mandrecha, ye l'extremu drechu de la cordalera mirando pa ella dende onde tamos nesti momentu. Una vegada enriba tuvimos una vista preciosa del Sueve (ensín ñublina, que ya ye suerte), Picos d'Europa, l'Aramu, y hasta pudimos ver la campa torres de Xixón y Aboño echando fumu.
Depués d'esto echamos un par de güevos y fuimos cresteando per tol cordal hasta llegar onde la guitarrina del Presi, que ye'l picu'l Texíu. Más allá, onde unes antenes tá el picu La Triguera, pero hasta ehí ya nun fuimos, tábemos ya abondo cansaos.
Nesti momentu entamamos el descensu a lo burro pela lladera sur y llegamos a unes camperes onde pacíen caballos. Per equí cerquina, nun sé del tou onde, tá el famosu pozu Funeres.
Agora ya garramos el camín que mos lleva de torna pa Melendreros.
Foi una caminata facilina y guapa y que se pué facer n'una mañana, pero nós ficímosla tranquilinos y a les 5 la tardi llegamos al coche.

Paseu per Taramundi (Os Esquíos - As Veigas - Os Teixois)

Esti fin de selmana paselu en Taramundi, tuvimos la moza y yo aloxaos nun pueblu nomau Bres. Esta zona ye mui desconocía pa mín, bono, en realidá ye mui desconocía tola zona occidental d'Asturies. Ya taba naguando por facer un recorríu per toa esta zona. El vienres llegamos a Bres y fuimos dar un paseín pela villa de Taramundi y asina de pasu coyimos unos panfletos de caminates pel conceyu.
Y ya el sábadu aprovechamos pa facer una rutina pequeñuca. Yera tan curtia que realmente fue un paseín. Dexamos el coche nel pueblu de Os Esquíos y fuimos caleyando pente una viesca de castaños. El díi taba mui soleyeru, la verdá que taba precioso pa caleyar. Llueu atopamos el pueblu de As Veigas. Al paecer esti pueblu desapaeciera fai dellos años, pero agora volvieron a recostruyilu, y lo que hai ye básicamente cases rurales y un restaurante. Nun sé nin siquiera si vive xente tol añu equí. Pero hai que dicir que ye perguapu, ye como de cuentu, de repente atópeslu y tá empozau nun valle. Depués sigues caleyando pel monte, ya per una zona mas descubierta d'árboles y acabes llegando al pueblu de Os Teixois, famosu en tola comarca pol conxuntu etnográficu que posee (molín, mazu y batán), too ello furrulando gracies a la enerxía del agua. Pué visitase por un módicu preciu, y merez muncho la pena, pero hai que venir abrigau porque nesti pueblu nun da'l sol en tol hibiernu, y facía un cutu qu'escarabayaba el pelleyu.
A la fin, en saliendo de Os Teixois y caleyando non más de media hora llegamos al puntu de partida, en Os Esquíos.
En total fueron 7 km mui prestosos de caminatuca y pudimos pañar unes castañes de pasu.
Amás pola tarde averámonos a un mayestru navayeru de los varios qu'hai pela zona y fízome una navaya bien guapa coles mios iniciales grabaes na fueya.

Picu Monsacro

Ayeri, sábadu 3 de payares fuimos al picu Monsacro, en Morcín. Ye un sitiu perguapu y que nun conocíamos nengún de nós. La forma de llegar ye mui facilina, hai que llegar hasta Santolaya de Morcín y d'ehí dir hasta la Collá(La Collada). Pocu enantes de llegar al pueblín de la Collá hai un camín con un cartelu que marca l'entamu de la ruta y que ya reflexa una xuba percuesta pa'l monte.
Depués de tar siguiendo el cuestu camín y faciendo eses monte p'enriba llégase a un colláu onde puén vese oveyes y caballos paciendo y dende onde acolumbramos ya mui cerquina la cima de La Fayona(1020 m) y el picu Monsacro(1057 m). Pero lo realmente interesante d'esti viaxe son les dos ermites qu'alcontramos equí enriba. Son la ermita de la Madalena y la de Santiago. La más interesante al mio paecer ye esta cabera, que ye de planta octogonal y pertenez al románico pero nun se sabe con seguridá el sieglu.
Namás llegar a esti colláu quedamos ablucaos cola belleza del paisaxe, eso sí, tuvimos qu'esperar un ratín qu'escampara la borrina, que nun mos dexaba ver un rés. En cuantes vimos apaecer estes ermites pente la ñublina foi como una aparición.
La verdá ye que esti ye un llugar que tién daqué especial, dalgo como máxico o místico. Prueba d'ello son los estudios que dicen qu'equí facíense cultos precristianos. Ésto revélenlo los túmulos funerarios descubiertos y el dolmen sobre'l que s'instaló la ermita octogonal.
Toes estes revelaciones dan respaldu al nome de Monsacro (monte sacro), too paez tar xunío y fae qu'esto seya algo más qu'un simple monte.
Al final, los mios collacios y yo sólo llegamos a xubir a La Fayona, y ye que nun tábemos mui seguros de cuál yera el Monsacro, suponíemos que yera'l inmediatamente contiguu, pero la borrina taba echándose enriba de nós peligrosamente y preferíemos dir tirando p'abaxo enantes que pasalo mal.
Al final la ruta fáese bien en cuatro horuques cuntando la ida y la torna.
De verdá qu'encamiento al tol mundu que descubra esti llugar, que merez la pena por muches razones, tanto paisaxístiques como hestóriques y culturales.

ruta Xixón - Cuadonga

Esta ruta son 75 kilómetros. La marcha entama en Xixón, más concretamente en Deva y llégase al santuariu de Cuadonga.
Ye la famosa ruta de la tertulia cultural "el garrapiellu". Pa ello, hai que siguir les marques que ellos punxeron. Éses marques son trisqueles (o garrapiellos) y n'algunos casos hai hasta cartelos de madera.
Ye una marcha mui guapa que pasa pelos conceyos de Xixón, Villaviciosa, Piloña, Parres y Cangues d'Onís.
Los díis de marcha varíen de ún a tres. La xente que va por primera vegada y nun tá mui d'andar aconseyo-y que la faiga en tres díis. Lo más normal ye facela en dos díis, y los más avezaos fáenla n'un díi.

Yo ya voi 4 años que la faigo. La primera vegada andúvela en tres díis. Hai que dicir que yera un 21 d'avientu y los díis son mui curtios, amás como dixe enantes ye perimportante nun pecar de atrevíu la primera vegada. Ésa primera vegada dormimos la primera noche en Sietes, y el segundu díi dormimos en Villanueva de Cangues.

Y ya los caberos tres años fícela en dos díis, y la planificación foi exactamente igual les tres vegaes.

Primer díi
Deva - Amandi - Borines (ente 35 y 40 km)

Segundu díi
Borines - Cangues d'Onís - Cuadonga (unos 35 km)

Esta ruta ye una mui cansada, pero que hai que disfrutala, sobremanera pol fechu de que pases por una cantidá grande de pueblinos y lo guapo que ye el paisaxe, sin perder de vista nunca el cordal del Sueve.