Ruta Angliru - Gamonal (1712m) - Moncuevu (1725m) - Gamoniteiru (1791m) - Angliru

Archivos Oziexplorer/CompeGPS:
Track: descargar (plt)
Mapes: descargar (zip)

Llugar: Sierra de L'Aramu
Duración: 7 hores
Puntu de salida: L'Angliru (Riosa)





Esta vegada averámonos a L'Aramu a modu d'entrenamientu pa la temporada de monte que vamos entamar darréu. Ye una ruta abondo llarga y que obgliga tar en bona forma.
Depués de dexar el coche nel Angliru, empobinábamos haza'l primer picu del díi. Trátase de la Gamonal, y podemos velu al llau nuestru, ye fácil identificalu pol pivote que tien enriba. Nesti momentu tamos frescos y facémoslo rápido. Caminamos en direición NO baxando al valle Xiniestru y pronto algamamos la cima (30 minutos).

Vista Gamoniteiru dende'l Gamonal

Facemos unes semeyes a la preciosa vista y entamamos el descensu. Nuestra meta agora sedrá la cima del Moncuevu. Baxamos per onde mos pete y más facilino lo veamos, y empobinámonos agora en direición SO pasando al llau del llagu o charca de Fonpedrín. Una vez equí entamamos la subida al Moncuevu. Ye una subida dura, como les tres ascensiones que mos toquen güei, anque yo atreveríame a dicir qu'esta ye la más dura de toes. Depués de salvar un desnivel bien fuerte, cuando temos na base de la cima, hai que rodiar ésta en direción E per un pasu que alcontramos a la manzorga y el caberu cachín que mos queda por subir fadrémoslu trepando un poquiñín ente les piedres hasta llegar arriba. Ya tamos na cima del Moncuevu (2h 15min). Hai que reconocer que ye una cima fea, con delles yerbes seques y ensín denguna señal que mos diga onde tamos.


El descensu complicósenos enforma. Punxímonos a baxar pela parte Sur, y la verdá seya dicha que taba un pelín peligroso, teniendo que baxar buena parte del recorríu col culu pegáu a les roques. Nun aconseyo baxar per esta parte, quicias seya mas facilino pela parte Este.
Una vez en baxu, y cola sudada que garramos, tócanos agora enfocar el Gamoniteiru, el caberu picu del nuestru recorríu. Dexamos a la nuestra mandrecha la braña de Vallongo y caminamos en direición S pel valle del mesmu nome. Depués d'un cachín entamamos a subir progresivamente la lladera que tenemos a la manzorga, que ye la parte oeste del picu Barriscal. Si ún se ve con fuerces, pué probar a subilu. Nós nun vamos facelo esta vegada porque entá mos queda un buen cachu pa finar la ruta. Darréu vamos ver al fondu el picu Gamoniteiru cola inconfundible antenona enriba la cima.

Vista del Gamoniteiru

Caminamos ya enfocando directamente el picu y pasamos pela mayá de La Florida, pero la subida fuerte vamos facela rodiando un poquiñín en direición Este la base del Gamoniteiru pa subir per una parte que ye prau, ensin roques nin ná y que a nuestru paecer ye la parte más fácil. Depués de subir un cachín y bastante cansaos de tolos kilómetros y subides que llevamos enriba nós, atopamos una pista de tierra que mos ayuda na subida final. Al llegar arriba vemos que hai hasta una carretera per onde suben coches y que llega hasta la cima. Lo nunca visto. Algamamos por fin la cima del Gamoniteiru (4h 30min).
El recorríu de vuelta facémoslu por un camín dalgo estremáu del de ida, rodiando pel otru llau el Barriscal. En cuantes que baxamos del Gamoniteiru caminamos en direición N pasando pel Xugu La Bola, rodiamos pela mandrecha el picu Barriscal y llegamos al Llagu de Robles. Dexamos agora a la manzorga unes cabañes con ganau paciendo. Ésta parte nun tuvimos mui acertaos, por querer evitar subides innecesaries dimos un rodeu pergrande. Nesti puntu yera meyor dexar estes cabañes a la mandrecha, llámase esta zona si nun digo mal, La Veguellina. Sólo mos queda caminar en direición NO pol sitiu mas afayadizu que veamos y llegaremos ensín problema dengún al puntu de partida, que nun ye otru que'l perconocíu Angliru (7 hores).